महापालिकेच्या (bmc) महसूलात वाढ व्हावी यासाठी पालिकेच्या अनुज्ञापन विभागाने मार्च 2024 मध्ये भुलाबाई देसाई मार्ग परिसरात जाहिरात फलक लावण्यासाठी निविदा मागवल्या होत्या.

त्या फलकांसाठी एमसीझेडएमएच्या (MCZMA) परवानगीसाठी पालिका प्रशासनाने प्रस्ताव सादर केला होता. एमसीझेडएमएने या जाहिरात फलकांसाठी ना हरकत प्रमाणपत्र दिले आहे.

एमसीझेडएमएने टाटा गार्डन, ॲमेझॉन गार्डन आणि लाला लजपतराय गार्डन जवळच जाहिरात फलक लावण्याची परवानगी दिली आहे.

हे फलक उद्यानात लावण्याची परवानगी नसल्याचे स्पष्ट करण्यात आले आहे. फलक लावताना त्याच्या संरचनात्मक स्थिरतेचे काटेकोरपणे पालन मुंबई महापालिकेकडून होणे आवश्यक असल्याचे एमसीझेडएमएने स्पष्ट केले आहे.

या जाहिरात फलकांमधून मोठ्या प्रमाणात महसूल मिळण्याचा अंदाज महापालिकेने वर्तविला आहे. तीन ठिकाणी जाहिरात फलकांमधून महापालिकेला महिन्याला एक कोटी रूपयांपेक्षा अधिक महसूल जमा होणार असल्याचा अंदाज वर्तविण्यात आला आहे.

गेल्या वर्षी कोस्टल रोडलगत जाहिरात फलक बसवण्याच्या महापालिकेच्या निर्णयामुळे शिवसेना (ठाकरे) पक्षाने विरोध केला होता. महापालिकेने तीन ठिकाणी फलक लावण्याचा निर्णय घेताना त्यासाठी निविदा काढली होती.

मात्र जाहिरात फलकासाठी निवडण्यात आलेल्या जागा सीआरझेड अंतर्गंत असल्यामुळे शिवसेनेचे आमदार आदित्य ठाकरे यांनी विरोध केला होता. कोस्टल रोडवर फलक लावण्याची परवानगी मिळाल्यास ते जिवितांसाठी आणि मालमत्तेसाठी धोकादायक ठरू शकते.

तसेच फलकांच्या दरांत तफावत असल्याने या निविदेत आर्थिक अनियमितता आहे. त्यामुळे ही कंत्राटे तात्काळ रद्द करून चौकशीची मागणी उद्धव ठाकरे यांनी केली होती. त्यानंतर हा मुद्दा थंडावला होता. त्यातच आता मंजुरीसाठी प्रस्ताव एमसीझेडएमएकडे पाठवला होता.

हेही वाचा

एकनाथ शिंदेंना मनसे महायुतीत नको होती : राज ठाकरे

राज्यात तीन दिवस थंडीची तीव्र लाट, IMD चा अंदाज